གདུང་གསོལ་དཔྱིད་ཀྱི་བུ་མོའི་གླུ་དབྱངས།

༄༅། ། ཀྱེ་མ་ཀྱེ་ཧུད༑ བཀའ་དྲིན་གསུམ་ལྡན་སློབ་དཔོན་རིན་པོ་ཆེ། །དད་དམ་གཙང་མའི་གླུ་ལ་ལན་ཅིག་གསོན། །བདག་ཅག་མགོན་མེད་རེ་ལྟོས་བཅའ་ས་མེད། །མངོན་དགའི་ཞིང་དུ་མ་བྱོན་ད་རེས་བཞུགས། །ཐུགས་རྗེ་ཀུན་ཁྱབ་སློབ་དཔོན་རིན་པོ་ཆེ། །མོས་གུས་གཅིག་ཆོག་གླུ་ལ་ལན་ཅིག་གསོན། །བདག་ཅག་མགོན་མེད་བློ་ཕུགས་གཏད་ས་མེད། །དབུ་མའི་ཕོ་བྲང་མ་གཞིག་ད་རེས་བཞུགས། །རང་བཞིན་ལྷུན་གྲུབ་སློབ་དཔོན་རིན་པོ་ཆེ། །ཅི་གསུངས་མཚན་འཛིན་གླུ་ལ་ལན་ཅིག་གསོན། །བདག་ཅག་མགོན་མེད་འོ་དོད་འབོད༌ས་མེད། །དྷུ་ཏི་ཡི་རང་སྒྲ་མ་འགག་ད་རེས་བཞུགས། །

གསོལ་འདེབས་མོས་གུས་ཀྱི་ཆུན་པོ།

༄༅། ། ཀྱེ་ཧོ༑ ཕ་བཀའ་དྲིན་གསུམ་ལྡན་བླ་མ་ལ། །བུ་མོས་གུས་གདུང་བས་གསོལ་བ་འདེབས། །མ་ཡིད་དམ་མཁའ་འགྲོའི་གྲོགས་དན་གྱིས། །ཆོས་རང་འགོ་འདྲོང་པར་བྱིན་གྱིས་རློབས། །སེམས་དག་པའི་ལྷ་ལམ་གུ་ཡངས་པོར། །སྣང་བ་སྣ་ཚོགས་དཔེ་རུ་བླངས། །དཔེ་ཉི་ཟླ་ལྷ་དང་བླ་མར་བླངས། །བླ་མ་ཀ་དག་གི་ངོ་བོར་བླངས། །ཕྱི་སྒྲོ་འདོགས་ཆོད་པའི་གདམས་ངག་ཞུ། །ནང་རང་བྱུང་ཡེ་ཤེས་ངོ་སྤྲོད་ཞུ། །བར་ལྷན་སྐྱེས་ཡེ་ཤེས་བརྡ་སྟོན་ཞུ། །མཇུག་དེ་ཉིད་རྟོགས་པའི་བྱིན་རླབས་ཞུ། །ཁྱེད་ཐུགས་རྗེ་ཀུན་ཁྱབ་ཀྱི་བླ་མ་ལགས། །ང་མོས་གུས་གཅིག་ཆོག་གིས་གསོལ་བ་འདེབས། །

བླ་མ་དང་མཚོ་སྐྱེས་རྡོ་རྗེ་དབྱེར་མེད་པ་ལ་གསོལ་སྨོན་ལྷན་ཅིག་ཏུ་འདེབས་པ།

༄༅། ། ཧོ༑ སྣང་སྲིད་ཀུན་ཁྱབ་ཐུགས་རྗེའི་ཞིང་ཁམས་ན། །དུས་གསུམ་རྒྱལ་བ་སྲས་བཅས་འདུས་པའི་སྐུ། །མཚོ་སྐྱེས་རྣམ་དཀར་དོན་ཀུན་གྲུབ་པ་ལ། །གསོལ་བ་སྙིང་ནས་འདེབས་སོ་ཐུགས་རྗེས་གཟིགས། །བཅོས་མིན་ངེས་འབྱུང་སྐྱོ་ཤེས་རྒྱུན་འཁྱོང་སྟེ། །མཐོང་ཚད་ལྷ་དང་བླ་མར་མ་དག་ན། །ཞེ་རུས་ལྟེམ་རྐྱང་མེད་པའི་མོས་གུས་ཀྱིས། །བརྡའ་བརྒྱུད་ཟབ་མོའི་བྱིན་རླབས་འཕོ་བར་ཤོག །གྲགས་ཚད་ལྷུན་གྲུབ་རང་བཞིན་ཞིང་ཁམས་ན། །རིག་འཛིན་དཔའ་བོ་མཁའ་འགྲོས་སྒྲོག་པའི་གསུང། །མཚོ་སྐྱེས་རྣམ་དཀར་དོན་ཀུན་གྲུབ་པ་ལ། །གསོལ་བ་སྙིང་ནས་འདེབས་སོ་ཐུགས་རྗེས་གཟིགས། །འཁྱོག་མིན་ཐོས་བསམ་ཡིད་དཔྱོད་མཐར་ཕྱིན་ཏེ། །ཐོས་ཚད་གཟུངས་དང་སྔགས་སུ་མ་དག་ན། །ཁ་ཞེ་གཉིས་སུ་མེད་པའི་བཟླས་བརྗོད་ཀྱིས། །སྙན་བརྒྱུད་ཟབ་མོའི་བྱིན་རླབས་འཕོ་བར་ཤོག །

བླ་མ་དང་ཐུགས་རྗེ་ཆེན་པོར་གསོལ་བ་འདེབས་པ།

༄༅། ། ན་མོ་གུ་རུ་ལོ་ཀེ་ཤྭ་ར་ཡ། བླ་མ་དང་ཐུགས་རྗེ་ཆེན་པོ་དབྱེར་མེད་པ་ལ་ཕྱག་འཚལ་ལོ། །མཁྱེན་ནོ་བླ་མ་མཁྱེན་ནོ། །ཨོཾ་མ་ཎི་པདྨེ་ཧཱུྃ། །བླ་མ་བུདྷཱ་མཁྱེན་ནོ། །ཨོཾ་མ་ཎི་པདྨེ་ཧཱུྃ། །ལྷག་པའི་ཤེས་རབ་ཟབ་མོས། །ཨོཾ་མ་ཎི་པདྨེ་ཧཱུྃ། །མ་རིག་མུན༌པ་སེལ་ཤོག །ཨོཾ་མ་ཎི་པདྨེ་ཧཱུྃ། །མཁྱེན་ནོ་བླ་མ་མཁྱེན་ནོ། །ཨོཾ་མ་ཎི་པདྨེ་ཧཱུྃ། །བླ་མ་དྷརྨ་མཁྱེན་ནོ། །ཨོཾ་མ་ཎི་པདྨེ་ཧཱུྃ། །ལྷག་པའི་ཏིང་ངེ་འཛིན་གྱིས། །ཨོཾ་མ་ཎི་པདྨེ་ཧཱུྃ། །རྣམ་རྟོག་འཁྲུལ་པ་འབྱིད་ཤོག །ཨོཾ་མ་ཎི་པདྨེ་ཧཱུྃ། །མཁྱེན་ནོ་བླ་མ་མཁྱེན་ནོ། །ཨོཾ་མ་ཎི་པདྨེ་ཧཱུྃ། །