རིག་པ་འཛིན་པའི་ཞོགས་ཐུན་ཅིག་གི་སེམས་རིས།

༄༅། །རྣམ་སྣང་གངས་མཚོའི་ཏིང་འཛིན་ཡུན་བརྟན་ཞིང་། །ཀུན་བཟང་ཐུགས་ཀྱི་བསྟན་པ་ཁྱོན་ཡངས་ཀློང་། །སྟོང་གསུམ་སྟོང་གི་བཀོད་པ་མཐས་ཡས་ནང་། །སྐར་མདའ་སྲིད་པའི་ཚུལ་འདི་རྒྱུ་བ་མཚར། །བཅུ་གསུམ་དུང་ཕྱུར་སྔོན་གྱི་གས་ཆེན་ཁྲོད། །མཛེས་མའི་ཁྱུ་ཚོགས་ས་ཡའི་འཕྲེད་ཀློང་དུ། །ཕྲན་གྱི་ཞིང་མཆོག་འཛམ་བུའི་མིང་ཅན་ཡང་། །གདུང་བྱེད་གུས་པས་བསྐོར་བའི་རྣམ་འགྱུར་ངོམས། །འདི་ན་དགུ་ཚིགས་སྟོང་གི་ཚོམ་བུ་དང་། །སྐར་ཚོགས་འབུམ་ཕྲག་བགྲང་ཡས་དབང་གྱུར་པ། །རྡུལ་ཕྲན་ཀློང་ནའང་རྡུལ་སྙེད་འཇིག་རྟེན་ཁམས། །འོད་དང་ཟེར་གྱི་བཅུད་འཛིན་ཆགས་འདི་རྨད། །

དྲ་གྲོགས་རྒྱང་བསྐུར་གྱི་འཕྲིན་ཐུང་།

༊ ཁྱབ་གདལ་ཁྱོན་ཡངས་ཀྱི་འཛིན་མར། །འཚོ་སྐྱོང་སྣ་མང་གི་འཕྲང་ལ། །ཞུམ་མེད་སྟག་སེང་གི་རྩལ་འཁྱོངས། །དྲ་གྲོགས་བློ་ཡངས་ཀྱི་དྲུང་དུ། །ཨར་འདམ་བྲག་རོང་གི་སྐྱིབས་ནས། །རིག་འཛིན་རྒྱུ་སྐར་གྱི་དབང་པོས། །རང་སྣང་མྱོང་ཚོར་གྱི་འཕྲིན་འདི། །སྒོ་གསུམ་གུས་ཕྱག་བཅས་ཞུ་གསོལ། །གར་བཞུགས་འོག་མིན་གྱི་ཞིང་ན། །སུ་བཞུགས་ཀུན་བཟང་གི་མགོན་པོ། །ཅིར་སྣང་འོད་གསལ་གྱི་འཚོ་སྐྱོང། །གདོད་མའི་བདེ་ཐང་རང་ལགས་སམ། །གར་ཡང་སྙིགས་མཐའ་ཡི་མཚམས་འདིར། །དཀའ་སྡུག་ཛ་དྲགས་སུ་འཚུབ་ཀྱང་། །སྒྱུ་མའི་འཕྲུལ་འཁོར་འདི་བསོ་རིང་། །ལེགས་འཚོའི་རེ་བ་ཞིག་ཡོད་དོ། །

རོ་སྙོམས་གྲོང་རྒྱུའི་རྣལ་འབྱོར་ལ་མཁོ་བའི་ཚིགས་ཕྲེང་བཞུགས།

༂ ཕཊཿ དཀོན་མཆོག་རྩ་གསུམ་རིག་འཛིན་རྒྱ་མཚོ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །བཟང་ངན་འབྲེལ་ཐོགས་མ་གྱུར་འགྲོ་བ་ཀུན། །རྣམ་མཁྱེན་གོ་འཕང་འཐོབ་པར་བྱིན་གྱིས་རློབས། །འདིར་སྣང་འདུ་འཛིའི་བྱ་བ་བློས་བཏང་སྟེ། །ཚོགས་དྲུག་དབེན་པར་འདྲིལ་བའི་རྣལ་འབྱོར་རྣམས། །དྭངས་མ་དྲུག་ལྡན་ཕུང་ཁམས་གསོ་བའི་ཕྱིར། །རོ་སྙོམས་ཟས་ཀྱི་ལྡོམ་བུ་སློང་དུ་བཞུད། ། ཕཊཿ དལ་རྟེན་པདྨོའི་ལང་ཚོ་བཞད་པའི་དཔྱིད། །རྣམ་དཀར་དྲི་བསུང་གཏུལ་བའི་འབྱོར་ལྡན་རྣམས། །ཕྱི་མར་འཚང་རྒྱའི་རྟེན་འབྲེལ་བསྒྲིག་པའི་ཕྱིར། །ཚོགས་བསགས་སྒྲིབ་པ་སྦྱང་བའི་བསོད་སྙོམས་ཞུ། །

དབྱིངས་གཟུགས་གཅེར་མོས་མྱོས་པའི་ལེགས་སྨོན།

༄༅། ། ཧོ་ལཱ༑ སྐྱབས་གནས་བསླུ་མེད་དཀོན་མཆོག་རིན་ཆེན་གསུམ། །མགོན་ལ་འཁྲུལ་མེད་ཆེས་མཆོག་རྩ་བ་གསུམ། །རེ་ལྟོས་ནོར་མེད་རྩ་རླུང་ཐིག་ལེ་གསུམ། །རྣམ་ཀུན་གཡེལ་མེད་བཏུད་དོ་ཐུགས་རྗེས་ཟུངས། །ཕྱོགས་བཅུ་རབ་འབྱམས་ཞིང་ན་བདེ་གཤེགས་ཀྱི། །རིགས་གཟུང་གདུང་འཚོབ་བི་ད་དྷ་རའི་ལམ། །གང་ཟག་མཚན་མས་མངོན་དུ་མ་བྱས་ཀྱང་། །རྒྱུད་ལྡན་རིག་འཛིན་ངེད་ཅག་བློ་རེ་བདེ། །མཁའ་དབྱིངས་དུས་ཚིགས་གཅིག་མཚུངས་རིག་པའི་ངོར། །ལོ་ཟླ་ཞག་དུས་སེམས་ཁྲལ་མི་དགོས་བཞིན། །ཐ་མལ་སྣང་ཞེན་དོད་པའི་ལོ་གྲངས་དང་། །ལུས་སེམས་གཉེར་མའི་ཁྱེར་གསོ་རྗེས་རུང་སྐྱིད། །

དོན་རྒྱན་བཞི་དང་རྟོག་རྒྱན་གཅིག་གི་དོ་ཤལ།

༄༅། ། ཀྱེ་ཀྱེ༑ ངོ་བོ་ཆོས་སྐུ་གདོད་ནས་མངོན་གྱུར་ཀྱང་། །རང་བཞིན་ལོངས་སྐུ་འགག་མེད་སྒྱུ་འཕྲུལ་གྱིས། །ཐུགས་རྗེ་སྤྲུལ་སྐུའི་འགྲོ་དོན་མཐའ་ཡས་པ། །མེ་མེ་བླ་མ་འདྲེན་མཆོག་ཡོངས་ཀྱི་གཙོ། །བཀའ་བསྟན་མང་དུ་ཐོས་ཤིང་བསམ་པས་མཁྱེན། །དབང་ལུང་ཡོངས་རྫོགས་ཞུས་ཤིང་སྨིན་པས་བརྩེ། །མན་ངག་རིས་མེད་སྒོམ་ཞིང་གྲོལ་བས་ནུས། །མཚུངས་བྲལ་མེ་མེ་བླ་མ་གཙུག་ན་རྒྱལ། །གང་གི་མཛད་རྣམ་རྒྱ་མཚོའི་ཆུ་ཐིག་ཙམ། །ཐོས་པས་དད་པའི་སྤུ་ལོང་འགུལ་ནུས་ན། །གཞི་སྣང་རང་སོར་རྟོགས་པའི་མན་ངག་སོགས། །ཞུས་སྐལ་མཆིས་པ་དེ་རྣམས་ཅི་མི་གྲོལ། །

བཀའ་རྙིང་དམ་ཅན་རྒྱ་མཚོའི་བསྟོད་འཕྲིན་ངག་དབང་ལྷ་མོའི་སྒྲ་བརྙན།

༄༅། ། ཧཱུྃ༑ གདོད་ནས་རྟ་མཆོག་རོལ་པའི་རྩལ་རྫོགས་ཀྱང་། །ད་དུང་བསྟན་དགྲ་ཚར་བཅད་ཆུ་ཟླའི་གར། །སྲིད་གསུམ་དབང་པོའི་གཙུག་གི་རྒྱན་གྱུར་པ། །དཔལ་མགོན་ནག་པོ་ཆེན་པོར་ཕྱག་འཚལ་བསྟོད། །རྣམ་སྣང་བདེ་གཤེགས་སྙིང་རྗེ་ཁྲོས་པའི་མདངས། །ཡེ་ཤེས་མགོན་པོ་ལྷ་ཆེན་དྲག་པོའི་གཙོ། །ཕོ་མགོན་མོ་མགོན་ལས་མགོན་ཡོངས་ཀྱི་རྗེ། །དྲེགས་པ་ཀུན་འདུལ་ཁྱེད་ལ་ཕྱག་འཚལ་བསྟོད། །ཁྲོས་པའི་སྤྲིན་ལས་སྡང་མིག་གློག་ཞགས་གཡོས། །འཇིགས་པའི་ཚེམས་ཀྱི་གནམ་ལྕགས་བསྟན་དགྲར་འབེབས། །ལྕགས་ཀྱི་སྡེར་མོས་དམ་ཉམས་སྙིང་འབྱིན་པའི། །སྔགས་སྲུང་གཙོ་མོ་རལ་ཅིག་ཁྱོད་ལ་བསྟོད། །

དགོང་དྲོ་ཞིག་གི་སེམས་རིས་ཇ་ཆང་གི་ཚོགས་འཁོར་ལ་ཟླ་བ།

༄༅། ། ཨ་རེ་ཧོ༑ ལྷོ་མོན་ཤིང་ལོའི་ཚལ་ན་རྐང་འཐུང་གི་གཞོན་ནུ། །ཡོན་ཏན་སྒྲོན་མ་ལ་སོགས་རོ་བརྒྱ་ཡི་སྙིང་སྡུག །ཛཱ་ཏི་སྨན་དང་ཚྭ་མར་ལྷན་ཅིག་ཏུ་བསྲུབ་པས། །ཁ་དོག་རོ་བཅུད་ལྡན་པའི་བསྲུ་ཇ་འདི་གར་བ། །བྱང་ཤར་རྒྱ་དཀར་འཁྱམ་གདལ་ཡུལ་ཀླུང་གི་རི་མདངས། །གཞོན་ནུའི་བུ་མོས་བཏུས་པའི་སྔོ་ལྗང་གི་ཇ་སྣ། །སྦྲང་རྩི་འོ་མ་ཀ་ར་བུ་རམ་དང་སྦྱར་བས། །ཞིམ་དགུའི་རོ་བཅུད་ལྡན་པའི་ཅཱ་ཡེ་འདི་མངར་བ། །ལྷོ་གླིང་ཀོ་ལཱོམ་བྷི་ཡར་འཕྲུལ་སྐྱེད་ཀྱི་འཐོན་སྐྱེད། །རོ་བརྒྱས་འདོད་རྒུ་འབྱིན་པའི་ནུས་ལྡན་གྱི་ཀཱོ་ཕི། །རང་རྐྱང་འོ་མངར་ཚ་བསིལ་གང་དགའ་རུ་བཟོས་པས། །དྲི་བསུང་རོ་མཆོག་ལྡན་པའི་འཚིག་ཇ་འདི་སྐ་བ། །