བཀའ་རྙིང་དམ་ཅན་རྒྱ་མཚོའི་བསྟོད་འཕྲིན་ངག་དབང་ལྷ་མོའི་སྒྲ་བརྙན།

༄༅། ། ཧཱུྃ༑ གདོད་ནས་རྟ་མཆོག་རོལ་པའི་རྩལ་རྫོགས་ཀྱང་། །ད་དུང་བསྟན་དགྲ་ཚར་བཅད་ཆུ་ཟླའི་གར། །སྲིད་གསུམ་དབང་པོའི་གཙུག་གི་རྒྱན་གྱུར་པ། །དཔལ་མགོན་ནག་པོ་ཆེན་པོ་འཁོར་བཅས་བསྟོད། །རྣམ་སྣང་བདེ་གཤེགས་སྙིང་རྗེ་ཁྲོས་པའི་མདངས། །ཡེ་ཤེས་མགོན་པོ་ལྷ་ཆེན་དྲག་པོའི་གཙོ། །ཕོ་མགོན་མོ་མགོན་ལས་མགོན་ཡོངས་ཀྱི་རྗེ། །དྲེགས་པ་ཀུན་འདུལ་འཁོར་དང་བཅས་ལ་བསྟོད། །ཁྲོས་པའི་སྤྲིན་ལས་སྡང་མིག་གློག་ཞགས་གཡོས། །འཇིགས་པའི་ཚེམས་ཀྱི་གནམ་ལྕགས་བསྟན་དགྲར་འབེབས། །ལྕགས་ཀྱི་སྡེར་མོས་དམ་ཉམས་སྙིང་འབྱིན་པའི། །སྔགས་སྲུང་གཙོ་མོ་རལ་ཅིག་ཁྱོད་ལ་བསྟོད། །

ལྷ་ཆེན་ར་བྲག་པའི་གསོལ་བསྡུས་ཀ་ཕྲེང་དགྲ་ལྷ་དགྱེས་པའི་མདུང་དར།

༄༅། ། རྃ་ཡྃ་ཁྃ། ཨོཾ་ཨཱཿཧཱུྃ༑ རྃ་ཡྃ་ཁྃ་ལས་རང་གནས་གཞལ་ཡས་སུ། །རིན་ཆེན་སྣོད་དུ་ཨོཾ་ཨཱཿཧཱུྃ་ཡིག་ལས། །ལྷ་ཆེན་གཙོ་འཁོར་དགྱེས་པའི་མཆོད་གཏོར་རྣམས། །བཞུས་ཏེ་ཡེ་ཤེས་བདུད་རྩིའི་ངོ་བོར་སྦྱང་། ། ཨོཾ༔ ཀ་དག་རང་གདངས་མཚོ་སྐྱེས་རྡོ་རྗེ་ཡིས། །ཁ་བཞིའི་ཡུལ་གྱི་སྲུང་མར་གཉེར་གཏད་ཅིང། །ག་དག་ཁམས་གསུམ་དབང་འདུས་ར་བྲག་པ། །ང་ཡི་ཡུལ་ལྷ་སྤུན་གསུམ་འདིར་གཤེགས་ཤིག །ཅ་ནོར་འདོད་རྒུས་ཕུན་ཚོགས་མཛེས་པའི་ལྗོངས། །ཆ་བྱད་ལྷུན་མཐོ་རྭ་བྲག་གངས་ཀྱི་རི། །ཇ་སྨན་རྩི་ཤིང་བཀྲ་བའི་ཕོ་བྲང་ནས། །ཉ་ངོག་རིག་འཛིན་དགྲ་ལྷ་འདིར་གཤེགས་ཤིག །

དམ་ཅན་གསོལ་བསྡུས་ཨ་ཕྲེང་རྩོལ་མེད་ཐོལ་བྱུང་བཞུགས།

༄༅། ། རྃ་ཡྃ་ཁྃ༔ ཨོཾ་ཨཱཿཧཱུྃ༔ ཀྱཻ༑ ཨ་ཏི་ཡང་རྩེ་ཐེག་པའི་གཞུང་ལུགས་ཀྱི། །ཨ་དོན་སྐྱེས་མེད་སྒོམ་པའི་རིག་འཛིན་ལ། །ཧ་ཕྱད་འགྲོས་ཀྱིས་འཕྲིན་ལས་སྒྲུབ་པ་པོ། །ཧ་དགོད་རྔམས་པའི་དམ་ཅན་འདིར་གཤེགས་ཤིག །ས་སྟེང་ཀུན་བཟང་དགོངས་པའི་བསྟན་པ་ཉིད། །ཤ་ཞེན་སྙིང་གིས་གཅེས་སྐྱོང་འཛིན་སྤེལ་སླད། །ལ་ལར་ཙམ་མིན་གདུང་བས་འབོད་ལགས་ན། །ར་མདར་འབྲལ་མེད་ཉུལ་བའི་དམ་ལ་དགོངས། །ཡ་ལད་གོ་ཆ་བཙན་རྨོག་མདའ་མདུང་སོགས། །འ་ཅི་ཀུན་བཟང་མཆོད་པའི་སྤྲིན་ཚོགས་སུ། །ཟ་ཟིས་འབག་མིན་སྨན་རཀ་བདུད་རྩི་བཅས། །ཞ་ལུར་ཡིད་སྤྲུལ་དངོས་སུ་བཤམས་པས་མཆོད། །

གདུང་འབོད་གསོལ་འདེབས་སྣང་སྲིད་གཞིར་བཞེངས་ཀྱི་གོ་ཡུལ།

༄༅། །ཀྱེ་ཧོ༑ ངོ་བོ་ཀ་ནས་དག་པ་ཀུན་ཁྱབ་ཀྱི་དབྱིངས་སུ། །རང་བཞིན་ལྷུན་གྱིས་གྲུབ་པ་ཉིན་བྱེད་ཀྱི་འཁོར་ལོ། །ཐུགས་རྗེ་ཕྱོགས་ལྷུང་བྲལ་བ་འོད་ཟེར་གྱི་སྒྱུ་འཕྲུལ། །སྐུ་གསུམ་ཀུན་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །དུས་གསུམ་སངས་རྒྱས་ངོ་བོ་དབྱེར་མེད་ཀྱི་བླ་མ། །ཟབ་གཏེར་ཆིག་རྫོགས་རང་བཞིན་འཁྲུལ་མེད་ཀྱི་ཡི་དམ། །དགེ་འདུན་འབུམ་ཚོགས་ཐུགས་རྗེ་འཁོན་མེད་ཀྱི་མཁའ་འགྲོ། །རྩ་གསུམ་ཀུན་འདུས་མཚོ་སྐྱེས་རྡོ་རྗེ་འདི་མཁྱེན་ནོ། །སྣང་སྲིད་སྙིང་པོའི་སྐུ་དང་ཕྱག་མཚན་གྱི་ཐུགས་རྗེ། །གྲགས་ཚད་འོད་ལྔའི་བུམ་དང་གསུང་དབྱངས་ཀྱི་རང་བཞིན། །

ལྷ་ཆེན་ར་བྲག་པའི་རླུང་རྟ།

༈ ཚེ་གཅིག་གཏན་གྱི་དགྲ་ལྷར་འགོས་པ་ལས། །ལུགས་གཉིས་གཞི་བྱེས་སྐྱོང་ལ་ཟླ་བྲལ་བའི། །ཁམས་གསུམ་དབང་འདུས་ལྷ་ཆེན་ར་བྲག་པ། །ཕྱོགས་བཞིར་རླུང་རྟ་སྤེལ་བའི་འཕྲིན་ལས་མཛོད། །འབྱུང་ལྔ་མཛའ་བའི་གྲོགས་སུ་འགུག་པ་ཡིས། །ཁམས་དྲུག་དྭངས་མའི་རླུང་རྟ་གནམ་ལ་འདེགས། །སྣ་བདུན་འབྱོར་པའི་དངོས་གྲུབ་ས་ལ་སྙིལ། །འཇིགས་བརྒྱད༌ཕྱོགས་མཐར་སྐྲོད་པའི་འཕྲིན་ལས་མཛོད། །རིམ་དགུ་ཐེག་པའི་གཤོག་རྩལ་ནང་ནས་རྒྱས། །ཆོས་བཅུའི་ཡོན་ཏན་ལོ་ནའི་ཚད་དུ་སྨིན། །བཅུ་གཅིག་སྒོམ་པའི་དབྱིངས་ལ་ལྡིང་བ་ཡིས། །བཅུ་གཉིས་བཞི་གསུམ་ཟིན་པའི་གྲོགས་དན་མཛོད། །

སྒྲོལ་མའི་རྒྱུན་ཁྱེར་ཤིན་ཏུ་བསྡུས་པ།

༄༅། ། ༀཿ རྗེ་བརྩུན་མ་འཕགས་མ་སྒྲོལ་མ་ལ་ཕྱག་འཚལ་ལོ། ཕྱག་འཚལ་སྒྲོལ་མ་ཉི་ཤུ་རྩ་གཅིག་མ། །འགྲོ་དོན་ཕྱག་མཚན་རྣམ་འགྱུར་འབུམ་ལྡན་མ། །དུས་གསུམ་རྒྱལ་བའི་འཕྲིན་ལས་ཀུན་སྒྲུབ་མ། །མ་གྱུར་འགྲོ་བའི་ཡུམ་ལ་ཕྱག་འཚལ་ལོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱཿ ཞེས་བརྒྱའམ་སྟོང་བཟླས་མཐར། རྗེ་བརྩུན་འཕགས་མ་སྒྲོལ་མ་ཁྱེད་མཁྱེན་ནོ། །འཇིགས་དང་སྡུག་བསྔལ་ཀུན་ལས་བསྐྱབ་ཏུ་གསོལ། །རྗེ་བརྩུན་འཕགས་མ་སྒྲོལ་མ་ཁྱེད་མཁྱེན་ནོ། །སྐྱིད་སྡུག་བཟང་ངན་འབྲིང་གསུམ་གཟིགས་སུ་གསོལ། །རྗེ་བརྩུན་འཕགས་མ་སྒྲོལ་མ་ཁྱེད་མཁྱེན་ནོ། །མཆོག་དང་ཐུན་མོང་དངོས་གྲུབ་བརྩལ་དུ་གསོལ། །རྗེ་བརྩུན་འཕགས་མ་སྒྲོལ་མ་ཁྱེད་མཁྱེན་ནོ། །བསམ་པའི་དོན་ཀུན་སྒྲུབ་པར་མཛད་དུ་གསོལ། །

རིགས་གསུམ་མགོན་པོའི་རྒྱུན་ཁྱེར་ཉུང་བསྡུས།

༄༅། །དྲི་མེད་མཁྱེན་རབ་དབང་པོ་འཇམ་དཔལ་དབྱངས། །དམིགས་མེད་སྙིང་རྗེའི་རང་གཟུགས་སྤྱན་རས་གཟིགས། །ལྷག་མེད་བདུད་དཔུང་འཇོམས་མཛད་གསང་བའི་བདག །རིགས་གསུམ་མགོན་པོ་ཁྱེད་ལ་ཕྱག་འཚལ་ལོ། ། ཨོཾ་ཝཱ་གཱི་ཤྭ་ར་ཧཱུྃཿ ཨོཾ་མ་ཎི་པདྨེ་ཧཱུྃཿ ཨོཾ་བཛྲ་པ་ཎི་ཧཱུྂཿ ཞེས་བདུན་ནམ་ཉེར་གཅིག་གམ་བརྒྱ་སྟོང་སོགས་བཟླས་རྗེས། དགེ་བ་འདི་ཡིས་མ་གྱུར་འགྲོ་བ་རྣམས། །བསོད་ནམས་ཡེ་ཤེས་ཚོགས་གཉིས་མྱུར་རྫོགས་ཏེ། །རིགས་གསུམ་མགོན་པོ་ཁྱེད་དང་དབྱེར་མེད་པར། །ལམ་ལྔ་ས་བཅུ་རིམ་གྱིས་བགྲོད་པར་ཤོག །

མཚུངས་མེད་རིགས་ཀྱི་བདག་པོའི་ཆེ་བརྗོད་དད་ཕྲན་ཀུ་ཤའི་ཟིལ་སྦྲོན།

༈ ཀྱེ་ཧོ༑ ལེགས་ཉེས་ཀརྨའི་སྒྲོག་གིས་རབ་བཅིངས་ཤིང་། །ཉོན་མོངས་དུག་ལྔའི་གདོན་གྱིས་རབ་གཟིར་ཏེ། །དབང་མེད་སྲིད་མཚོའི་གཤམ་ན་རབ་ཐིམ་པོར། །མགོན་ཁྱོད་གྲུ་ཆེན་ཡོན་ཏན་ཀུན་གྱིས་ཕྱུག །ཉོན་ཤེས་གཉིས་ཀའི་སྒྲིབ་ལས་རབ་གྲོལ་ཞིང་། །ཡེ་ཤེས་རྣམ་ལྔའི་འོད་མདངས་རབ་རྒྱས་ཏེ། །ཞི་བའི་རིན་ཆེན་གླིང་དུ་རབ་བཞུད་པོར། །མགོན་ཁྱོད་དེད་དཔོན་ཡོན་ཏན་ཀུན་གྱིས་ཕྱུག །ལས་དང་ཉོན་མོངས་སྤྲིན་གྱིས་རབ་འགྲིབ་ཅིང། །མ་རིག་རྨོངས་པའི་མུན་པས་རབ་དུབ་ཏེ། །ངེས་ལེགས་ལམ་ནས་རྒྱང་དུ་རབ་འཁྱོར་པོར། །མགོན་ཁྱོད་ས་མཁན་ཡོན་ཏན་ཀུན་གྱིས་ཕྱུག །

དགེ་སྦྱོར་ཡན་ལག་བདུན་པ།

༈ བླ་མ་མཁྱེན་ནོ། མ་དག་ཕུང་ཁམས་འཁྲུལ་པའི་རྫིང་བུ་རུ། །གང་འདུལ་སྒྱུ་འཕྲུལ་ཆུ་ཟླའི་གར་བསྒྱུར་ཀྱང་། །རྣམ་དག་སྐྱེས་མེད་དབྱིངས་ལས་མ་གཡོས་པ། །སྐུ་གསུམ་ཀུན་འདུས་བླ་མ་ཁྱེད་མཁྱེན་ནོ། །རྣམ་མང་ཕྱོགས་བཅུའི་ཞིང་ཁམས་རྒྱ་མཚོ་ན། །ཇི་སྙེད་རྒྱལ་དང་རྒྱལ་སྲས་བཞུགས་པ་ལ། །དེ་སྙེད་བདག་ལུས་རྣམ་པར་སྤྲུལ་པ་ཡིས། །ལུས་ངག་ཡིད་གསུམ་དྭང་བས་ཕྱག་འཚལ་ལོ། །འདོད་གཟུགས་དབྱིངས་སུ་ཕུན་ཚོགས་ཅི་ཡོད་དང་། །རྒྱལ་ཆེན་རི་བཞིའི་མངའ་ཐང་འབྱོར་པས་གཙོས། །བདག་ལ་ཅི་མཆིས་འཛམ་གླིང་ཟས་ནོར་ཀུན། །བློས་བླངས་ཡིད་སྤྲུལ་དངོས་སུམ་བཤམས་པས་མཆོད། །